by May’s Healthy Food for Food Magazine

          ဒီတစ်လတော့ အိမ်က သမီးအကြိုက် ကင်းမွန်ချိုချဉ်ချက်လေး ရေးပေးပါမယ်။ တချို့ကလေးတွေကတော့ ပင်လယ်စာနဲ့ ဓာတ်မတည့်ခြင်းဖြစ်တတ်တာမို့ သတိထားပြီး ကျွေးစေချင်ပါတယ်။

          ကင်းမွန်ကို သန့်စင်တဲ့အခါ ဆားလေးပွတ်ပြီး အရေခွံကိုခွာ၊ အလယ်ကနေ ကတ်ကြေးနဲ့ညှပ်၍ ဆားလေးနယ်ပြီး သန့်စင်ပေးပါ။ သေချာရေဆေး၍ ဓားနဲ့မပြတ်သွားအောင် အမြှောင်းလေးတွေ ဘယ်ညာလှီးပြီး အနေတော်လှီးဖြတ်ပါ။

ပါဝင်ပစ္စည်းများ

ကင်းမွန်  –  ၅၀ ကျပ်သား (သန့်စင်ပြီးသား)

ကြက်သွန်ဖြူ  –  ၁ လုံး

ကြက်သွန်နီ  –  ၃ လုံး

ချင်း  –  လက်တစ်ဆစ်

ဂျပန် ဟင်းချက်ဆန်အရက်  –  ထမင်းစားဇွန်း ၁/၂ ဇွန်း (မထည့်လည်းရ)

ခရုဆီ  –  ထမင်းစားဇွန်း ၁ ဇွန်း

ဆား  –  အနည်းငယ်

ငရုတ်ကောင်းဖြူ  –  အနည်းငယ်

ဆီ  –  ထမင်းစားဇွန်း ၁ ဇွန်း

ချယ်ရီ ခရမ်းချဉ်သီး  –  ၁၅ လုံး

ပြုလုပ်နည်း

၁။       ကြက်သွန်ဖြူ/နီ၊ ချင်းကို ထောင်းပြီး မွှေးလာအောင် ဆီသတ်ပါ။

၂။       မွှေးလာပြီဆိုလျှင် ကင်းမွန်ထည့်ပါ။ အဖုံးမဖုံးရ။

၃။       ကင်းမွန်ထည့်ပြီး ၁၀ မိနစ်ခန့်ဆိုလျှင် ရေခန်းလုနီးနီးဖြစ်ချိန်မှာ ခရမ်းချဉ်သီး ခြမ်းထည့်ပြီး ဆား၊ ခရုဆီ၊ ငရုတ်ကောင်းထည့်မွှေပါ။ ၃ မိနစ်ဆိုလျှင် ရပါပြီ။ ကင်းမွန်က ချက်ချိန်ကြာလျှင် မာသွားတတ်ပါတယ်။ ဆား၊ ခရုဆီကို အစကတည်းက ထည့်လျှင် ရေအများကြီးထွက်လာတတ်တာမို့ နောက်ဆုံးမှ ထည့်ပါ။

          ထမင်းဖြူပူပူလေးနဲ့ အရမ်းလိုက်ဖက်တဲ့ ချိုချိုချဉ်ချဉ် ကင်းမွန်လေးက ကလေးတွေအကြိုက် ဖြစ်စေမှာပါ။